पाथर्डी शिवारातील सदाशिवनगर येथील कृष्णा प्राइड अपार्टमेंटमधील फ्लॅटमध्ये गुरूवारी (दि. २९) दुपारी विवाहित महिलेचा मृतदेह आढळून आला. निशा मयूर नागरे (वय- ३५) असे मृत महिलेचे नाव आहे. तिचा गळा आवळून खून केल्याचा प्राथमिक अंदाज पोलिसांनी वर्तवला आहे. महिलेचा पती बेपत्ता असून महिलेचा मोबाइल व कागदपत्रे घरात आढळून आली नाहीत.
सहाय्यक पोलिस आयुक्त शेखर देशमुख, सहाय्यक पोलिस निरीक्षक सुनील अंकोलीकर, उपनिरीक्षक संतोष फुंदे आदींनी पाहणी केली. पंचनामा करून मृतदेह शासकीय जिल्हा रूग्णालयात शवविच्छेदनासाठी पाठवण्यात आले. शवविच्छेदन शुक्रवारी (दि.३०) सकाळी फॉरेन्सिक पथकाच्या उपस्थितीत केले जाणार आहे. यानंतर या महिलेच्या मृत्यूमागील नेमके कारण समोर येईल, असे पोलिसांनी सांगितले.